CITEA

A conca do río Tea atesoura unha das comunidades piscícolas mellor conservadas de Galicia, onde habitan ciprínidos endémicos como a boga de río e a reñosa, a pancha e o escalo, que conviven cunha das mellores poboacións de troitas da vertente atlántica galega. A estas especies sedentarias hai que sumarlle aqueloutras que precisan de desprazamentos ao longo da súa vida entre o mar e o medio fluvial, e que cada vez son máis escasas por mor da presenza de barreiras artificiais postas polo ser humano. Pertencen a este grupo a lamprea e o salmón atlántico, que ten nos cursos fluviais da conca do Tea un dos últimos redutos na súa batalla contra a extinción.

As lampreas nacen no río onde as larvas viven soterradas nos fondos de area cinco ou seis anos, alimentándose de detritus orgánicos e pequenos invertebrados. Logo dunha metamorfose descenden ata o mar, onde levan unha vida parasita, durante un ou dous anos, zugando o sangue de animais mariños como o xurelo, o peixe espada ou mesmo a toniña. As lampreas adultas retornan ao río entre os meses de decembro e marzo.