CITEA

O río Tea conta cunha complexa comunidade de libeliñas, entre as que se atopan especies moi localizadas en Europa e que teñen neste río algunhas das últimas poboacións.

O grupo popularmente denominado como cabaliños do demo, comprende en realidade as libeliñas e os gaiteiros, insectos acuáticos que viven un ou dous anos na auga en estado larvario de cores crípticas. Nese estado desenvólvense respirando o osíxeno disolto na auga, ata que nas últimas semanas de vida a abandonan e realizan unha última muda; tras ela, saen convertidas en fermosos animais voadores que se alimentan fundamentalmente de mosquitos e tabáns.

As augas do Tea consérvanse limpas e osixenadas, ricas en invertebrados acuáticos e, en particular, en insectos que se manifestan nos voos rápidos; ademais cómpre salientar as grandes libeliñas e as nubes de pequenos insectos alados como as efémeras, os tricópteros e os siálidos, que voan en contra da corrente para recolonizar as partes altas do río.

Un dos grupos que pode observarse é o das percebellas acuáticas. Destas cómpre salientar a familia dos “gerridae”, o escorpión acuático ou rezadeira de auga e a nespra acuática, da familia dos notonéctidos